Mit Jahresende beendete Heidi Ram nach 14 Jahren ihren Dienst im PFARRBÜRO STUMM und möchte sich auf diesem Weg gerne verabschieden.
Da is‘ man guat 50 Jahre auf der Welt
und denkt sich insgeheim, dass da irgendetwas fehlt!
Man sollte doch noch etwas im Leben tun,
es ist ja viel zu früh, um sich auszuruh‘n!
Aber auf oamol, do is was passiert –
Stumm hat an neichn Pfarrer kriagt!
Der braucht a Sekretärin, des is koa Frag`,
er muass ja unterrichtn so manche Tag!
Da hat’s fi mi de groaße Chance a’gebm,
dass i ku do no mein Wunschtraum erlebm!
Da Anfang war natürlich dann net so leicht,
aber mit vereinten Kräften hat ma viel erreicht!
Und is mit da Zeit a de Arbeit einegwachsn,
hat a da Computer a diamol gmacht Faxen!
Bald is gangen mit de Renovierungarbeitn u,
als eachtes war der Pfarrhof innen und außen dru!
A des Dach vo da Kirche war dann ganz desolat,
bei’m Umgang mit de Behörden war ins ja gar nia fad!
An Pfarrer sei liabstes Haustier hat miassn umgsiedelt werdn,
da hat er dann miassn do bald a Gsatzl rearn!
Und froah war er aber um den wertvollen Mist,
weil des ja a guate Einnahm‘ für de Kirchenkass‘ ist!
De Fledermäus gfrei’n si über den Bsuach vo de Schualer sehr,
der Pfarrer – ku i mir denkn – wohl weit weniger!
De Kirch in Hart erstrahlt iatz ja a in vollem Glanz,
aber mit’n Friedhof hat’s jahrelang klappt net so ganz!
Und de Kirchensanierung zuletzt in Stumm,
hat alle wirklich gfordert, rundummadum,
bis manche da a Geld aussaruckn,
brauchts viel Geduld, liaber tatn sie si druckn!
Als „Pinzgara“ tuat ja an Pfarrer de Aussprach a diamol vadriassn.
Da hun i eahm a hin und wieda eppas „ausdeitschn“ miassn,
obwohl i ja a bin a „Zuagroaste“ bloß,
nach über 40 Jahr hun i det a bissl eppas los!
Aber iatz is halt nach 14 Jahr soweit,
zan Abdankn kimmt fi mi de Zeit!
Viel kunnt i enk ja no berichtn,
unsagbar traurige und herzzerreißend schiane Gschichtn!
I hu viel dafragt, wenn zu mir kemmen hen de Leit,
gern hu i mia gnommen zan Hoagachten a bissl Zeit!
Unzählige Kinder hen worden bei ins da getauft,
a habm sich ganz viel‘ Paare in insra schian Kirche getraut!
Aber a viel Leit – jung oder alt – habm beendet ihr Lebm,
und mia habm ihrn Abschied an würdign Rahmen gebm!
De vergangenen Jahr, des war wohl mei allerschianste Zeit
und hat mir a tol gholfen über ganz schwares Leid!
Vergelt‘s Gott enk allen, i hab enk gearn megn,
mia weardn ins wohl allweil wieda amol segn!
Aus is‘ und gar is‘ und schad is‘, dass wahr is‘!!
Pfiat enk und bleibt’s alle gsund!
Eure Heidi Ram